“إيه يا حبيبي اللي مقعدك على كرسي ده إنت لسه صغير على الحاجات دي أمال لما تكبر هتعمل ايه؟”
قالتهالي واحدة معرفهاش فضلت مبرقالي واحنا في صالة الانتظار عند دكتور. مكانتش لا أول ولا آخر حد يبرقلي ويبص لي بستغراب، وفي ناس وأنا ماشي في الشارع بيبصوا لي ويقولوا “الحمد لله الذي عفانا” أو “ربنا يشفيك يابني”، وأنا أصلا مش عيان! وكلام كتير بسمعه لحد دلوقتي زي “مش هتقدر”، “مش هينفع”، “مش للى في حالتك”. مش هينفع ليه؟ مش ليا ليه؟ أنا بلاقي نفسي في الرياضة، دي الحاجة الوحيدة اللي مابتقوليش لأ ودايما موجودة، عمرها ما قالت لي لا مش هينفع ولا مش هتقدر ولا أصلك “معوق”. وكل ما اديها تعب ومجهود بتديني قوة وسرعة وثقة بالنفس وبتساعدني احقق انجازات كانت بالنسبة لي حلم من سنين.
رحلتي من ساعة الحادثة للحظة دي مكنتش اتخيلها من واحد بيعاني من أفكار سلبية وخواطر محبطة للمصنف رقم ٥ عالميا في السباحة وأول العالم العربي وأفريقيا وأسرع سباح في مصر ٩ سنوات ورا بعض. عملت كدا بالمثابرة و المعافرة والأمل والأهم من ده كله اتعملت ازاي اطور من طريقة تفكيري ونظرتي وحكمي على الامور واني اشوف الفرص في التحديات وأحول التحديات دي لقصة نجاح من خلال الإيمان بربنا والإيمان بنفسي اني اقدر. دي القصة اللي ببقى عاوز المجتمع يشوفها. اه الرحلة صعبة، بس مش مستحيل زى ما كان بيتقال لي.
علشان كده مؤمن جدا بدور التوعية والدمج. لازم نظرة المجتمع للأشخاص ذوي الإعاقة تتغير ولازم نظرة الأشخاص ذوي الإعاقة لنفسهم كمان تتغير. في الحالتين لازم يكونوا شايفين إن الأشخاص ذوي الإعاقة يقدروا وإنهم مش أقل من أي فرد في المجتمع. محتاجين حملات توعية ممنهجة ونبدأ بالأجيال الجديدة في المدارس والجامعات عشان لما يكبروا يبقوا فاهمين يعني ايه إعاقة ويتقبلوها مش بدافع الشفقة بس علشان ده حقهم. نفسي اشوف كل الأماكن زي مافيها سلالم يبقى فيها منزل ومطلع (رامب) واسانسير، وزي ما فيها جراج يبقي فيها ركنات مخصصة للأشخاص ذوي الإعاقة، ويبقي في طابور خاص للأشخاص ذوي الإعاقة في كل المصالح والهيئات الحكومية والخاصة.عاوز ألاقي الدمج في كل الخدمات، ووسائل النقل العام، والتعليم، الصحة، والأماكن العامة علشان أنا بقدر امشي بس بطريقة مختلفة.
أنا بدعم صندوق عطاء وبشجعكم تدعموه لأنهم بيشتغلوا على إن الأماكن العامة والخاصة تبقى مجهزة للأشخاص ذوي الإعاقة وزي ماقدرت أكسر حواجز في حياتي، أنتم كمان كسروا معانا الحواجز اللي هتخلينا كلنا ناخد حقوقنا مهما كنا مختلفين عن بعض.
إسلام ابو علي
